Betre tilgang til arbeidskraft med rett kompetanse 2025

Målet med ordninga 

Ordninga skal legge til rette for prosjekt for å betre tilgangen på arbeidskraft med rett kompetanse i Møre og Romsdal. Ordninga skal fremje utvikling av relevante utdanningstilbod, auka samarbeid mellom utdanningsinstitusjonar og arbeidslivet, gjere utdanning meir tilgjengeleg for folk i distrikta og bidra til å kvalifisere fleire som står utanfor arbeidslivet en veg inn. Ordninga er eit tiltak knytt til Fylkesstrategi for kompetanse. 

Kven kan søke? 

Både utdanningstilbydarar og offentlege eller private verksemder kan søke støtte, men ordninga vil prioritere prosjekt der desse aktørane inngår i eit tydeleg og forpliktande samarbeid med kvarandre. 

Kva kan du søke støtte til? 

Å utvikle nye utdanningstilbod som er relevante for arbeidslivet i Møre og Romsdal.  

Nye utdanningstilbod kan vere innanfor universitet og høgskole, høgare yrkesfagleg utdanning (fagskole) eller vidaregåande opplæring. Nye utdanningstilbod skal gi formell kompetanse i form av fagbrev eller studiepoeng, og kan vere nye emne eller modular eller nye måtar å tilby eksisterande utdanningstilbod på.  

Døme på nye måtar å tilby eksisterande utdanningstilbod på kan vere å tilpasse stadbasert opplæring til samlingsbasert og/eller nettbasert opplæring. 

Å utvikle nye kompetanseprogram som er relevante for arbeidslivet i Møre og Romsdal.  

Med kompetanseprogram meiner vi ei strukturert opplæring med fagleg innhald. Programmet skal vere utvikla med mål om deltaking frå fleire organisasjonar.   

Det er ikkje krav om at kompetanseprogram skal gi formell kompetanse, men du kan ikkje søke støtte til konferansar, korte møter og verkstader.   

Å utvikle samarbeid mellom utdanningsinstitusjonar og arbeidsliv

Her kan du søke om støtte til mindre prosjekt med maksimal støtte per prosjekt er 200 000 kroner. Målet er å skape betre og meir arbeidsrelevant utdanning i fylket og gjere elevar og studentar betre kjent med arbeidslivet i regionen.

Søknaden må omhandle eitt eller fleire desse områda

• bruk av arbeidslivet inn i undervisning og opplæring
• meir praktisk opplæring
• samarbeid om oppgåver mellom arbeidslivet og studentar og elevar

Å utvikle samarbeid om og nye måtar å kvalifisere fleire som i dag står utanfor en veg inn i arbeidslivet

Det er i dag mange som står utanfor arbeidslivet i fylket. Under ordninga kan de søke om prosjekt som legg til rette for at fleire av de som står utanfor kjem i jobb. Prosjekt kan anten vere knytt til utvikling av samarbeid mellom aktørar, eller utvikling av nye måtar å kvalifisere fleire som i dag står utanfor arbeid inn i arbeidslivet.

Korleis søker du, og når er fristen? 

Du må fylle ut søknadsskjema og sende inn søknaden på tilskotsportalen www.regionalforvaltning.no  

Søknader om tilskot på mindre enn 500 000 kroner har ingen søknadsfrist og vert behandla fortløpande av kompetanse- og næringsavdelinga i fylkeskommunen.  

Søknader om 500 000 kroner eller meir i tilskot vert behandla politisk av kompetanse- og næringsutvalet, og må leverast innan ein av desse fristane:  

• 1. april 2025 (blir behandla 8. mai) 

• 1. mai 2025 (blir behandla 5. juni) 

• 1. juli 2025 (blir behandla 18. september) 

• 15. september 2025 (blir behandla 23. oktober) 

• 1. november 2025 (blir behandla 4. desember)  

Fylkeskommunedirektøren kan bestemme at også søknader om mindre enn 500 000 kroner blir lagt fram for politisk behandling, dersom vedtaket krev politisk skjønn. 

Andre vilkår du må vere merksam på

Du kan søke om støtte til ekstraordinære utviklingskostnader, ikkje til ordinær drift. Vi støttar ikkje aktivitetar som alt er starta eller gjennomført.

Tilskot frå fylkeskommunen er avgrensa til maksimalt 50 prosent av totalkostnad. Finansiering gjennom eige arbeid i prosjektet har ein timepris på 1,2 promille av årsløn, maksimalt 1 100 kroner per time.  

Vi kan betale ut 75 prosent av tilskotet undervegs i prosjektperioden, basert på innrapporterte kostnader. Ytterlegare vilkår vert gitt i tildelingsbrev.

Søknader blir vurdert opp mot statstøtteregelverket, og alle opplysningar i søknad og saksbehandling er offentlege.

Korleis vurderer vi søknaden?

Alle søknader vert vurdert etter desse tre kriteria:

1. Kvalitet og innovasjon.
1. Relevans i høve til utlysinga: «Treff» prosjektet utlysinga, og svarer det på vilkåra til ordninga?
2. Innovasjon: Alle prosjekt må ha ei form for nyskaping eller stegvis utvikling, sjølv dei små. Der eit prosjekt liknar på noko som har blitt gjort før bør søknaden gjere greie for ulikskapar.
3. Metode: Prosjektet skal ha eit klart mål og gode delmål, men skal også beskrive korleis dei vil oppnå desse og vise til smarte indikatorar for måloppnåing og effektar.
2. Effekt og verdiskaping.
1. Verdi for søkaren og regionen: Det skal kome godt fram korleis prosjektet skal skape verdi for regionen, partnarskapet og søkaren. Prosjektet skal også vise korleis det svarar ut måla til regionen for grøn industrivekst, berekraftig utvikling eller andre område omfatta av regionale planar.
2. Moglegheit for vidareutvikling: Det skal vere tydelege moglegheiter og planar for å ta prosjektet vidare etter sluttføring, gjerne ved å vise til større nasjonale og internasjonale ordningar, innhenting av privat kapital eller anna form for kommersialisering eller vidare verdiskaping.
3. Kommunikasjon og kompetansedeling: Prosjektet skal vise til korleis prosjektet og resultata skal bli formidla til relevante målgrupper som næringsliv, lokalsamfunn og offentlege aktørar på måtar som engasjerer og skapar positive ringverknader og læring. For store prosjekt skal det vere utarbeidd ein kommunikasjonsplan.
3. Gjennomføring.
1. Prosjektplan: Det skal kome tydeleg fram korleis prosjektet skal gå fram for å nå måla og delmåla som er definerte, gjerne i form av ulike arbeidspakker med ulike ansvarlege og prosjektfunksjonar.
2. Risiko: Prosjektet skal drøfte særleg sannsynlege hindringar som kan oppstå og greie ut korleis desse bli førebygde og møtast for å minske risiko.
3. Ressursbruk: Prosjektet skal ha eit realistisk budsjett. Budsjettet skal spegle partnarar og innsatsane deira, og skal også gjere tydeleg ulike finansieringskjelder.

Alle søknader får ein karakter mellom 1-7 på kvart kriterium. Prosjektsøknader må få ein karakter på 4 eller betre på alle kriteria for å kvalifisere for tilskot. Søknader om tilskot på mindre enn 500 000 kroner blir vurderte av minst to saksbehandlarar i kompetanse- og næringsavdelinga. Søknader om 500 000 kroner eller meir blir vurderte av eit fagpanel før politisk behandling.